Guddiga Abaaraha Gal Mudug Oo Soo Bandhigay Warbixin La Xariirta Macaawinada Soo Gaartay Iyo Meelaha Ay Gaarsiiyeen.

 

Gaalkacyo Arbaco 22/4/2008(ICM)(NEWS)

  Guddiga gurmadka abaaraha dowlad goboleedka Gal Mudug ayaa sheegeen in ay macaawino qaybintii ay dhowaan ka fuliyeen  ay gaarsiiyeen dadka ku dhibaataysan ilaa 45 tuulo oo ka kala tirsan hoosna yimaada degmooyinka Galliinsoor.Bandiiradleey iyo Dagaari kana kala tirsan gobollada Mudug iyo Galgaduud

 Macaawinadaan ayaa guddigu sheegay in ay  isugu  jirtay nuucyo kala duwan oo quutul daruuri ah ayna  ku ammaanan yihiin qaar ka mid ah shirkadaha , Hay,daha samafalka wadaniga   .ururrada bulshada gobolka Mudug iyo Jaaliyadda dibadda gal Mudug. Qaarkood.

   Guddoomiye ku xigeennada  iyo xoghayaha Guddiga   gurmadka Abaaraha Dowlad goboleedka gal mudug oo kala ah Axmad Maxamuud Xasan (Baasto).Cabdinuur Axmed Kullane iyo Cal-baashi Faarax Cali ayaa sheegeen  In   dhaqaalaha dibadda iyo gudaha dalka ay taakulayn ahaanta wax u qabashada dadka abaaruhu haleeleen  guddigana soo gaartay ay  dhan tahay $ 39.680  (39 kun.lix boqol iyo sideetan) doolar taas oo ay inteeda badan kala bixiyeen dhinaca dibadda Jaaliyadda gal Mudug ee Maraykanka  $ 11 kun oo doolar..Jaaliyadda gal mudug ee Kanada $ 9 kun oo doolar iyo Jaaliyadda Gal Mudug ee Iskandaneefiyaanka oo bixisay  $ 6 kun oo doolarka Maraykanka ah..

   Guddoomiye ku xigeennada iyo xoghayaha guddiga gurmadka Abaaraha dowlad goboleedka Gal Mudug oo habeenkii xalay ka qayb qaadanayeen barnaamijka todobaadkiiba  jeer  ka baxa idaacadda Codka Mudug ee falanqaynta caawa iyo codka Mudug  ayaa soo  bandhigayeen baahida jirta iyo waxqab ahaan waxa ilaa iyo hadda uga qabsoomay guddigaasi howshii gargaar gaarsiinta dadka ku abaarsaday deegaannada Gal Mudug iyagoo ammaan u jeediyeen shirkadaha xawaaladaha Hodon Global oo ku deekhday $ 5 kun oo doolar iyo shirkadda dahab shiil oo iyaduna dadka abaaraha ku taakulaysay $ 1000 doolar.

   Axmed Maxamuud Xasan (Baasto) Cabdinuur Axmed Kullane iyo Cal-baashi Faarax Cali ayaa waxaa kaloo ay ammaan u jeediyeen shaqaalaha iyo maamulka isbitaalka koofurta  Gaalkacyo.Hay,adaha wadaniga SCDO.iyo SDRO,Dugsiyada Magaalada Gaalkacyo ee dowlad goboleedka Gal Mudug..oo ay sheegeen in ay qayb wax ku ool ah ka gaysteen taakulaynta dadka abaaruhu halakeeyeen.iyagoo ammaan aad u sarraysana u soo jeediyeen idaacadda codka Mudug

   Guddigaan oo sheegeen in deg deg loogu howlgalayo sidii gargaar loo gaarsiin lahaa dadka ku dhibaataysan deegaannada kale ee ay abaartu saamaysay ee Gal Mudug oo ay ugu soo horsayo deegaannada u dhaxeeya waddada laamiga ah ee Gaalkacyo iyo Cadaado isku xirta  iyo deegaannada waddada hobyo ka jirta dhinaca laamiga  ayaa dhaliisha ka sakoow ka codsadeen Ganacsatada gobolka Mudug iyo jaaliyadda dibadda  ee aan wali gacanta ka gaysan wax u qabashada walaalahooda dhibaataysan ay sida ugu dadaalka badan taakulayn wax ku ool ah ugu soo shubaan akoonnada loo furay taakulaynta Abaaraha ee ka kala furan shirkadaha xawaaladaha qaarkood.
   Warbixinta iyo su,aalaha arrimahaan la xariira oo muddo hal saac ah ka socdeen idaacadda codka Mudug ee Magaalada Gaalkacyo ayaa waxaa kaloo qadadka taleefoonnada uga soo qayb galeen qaar ka mid ah dadweynaha Magaalada Gaalkacyo oo muujiyeen taageerada ay u hayaan gargaar u fidinta dadkaasi Dhibaataysan iyo ku taageeridda howlaha ay hayaan guddigaasi.

 

 Diyaariye: Cilmi Kulan Geeddi

addarees ckg114@hotmail,com or
tel 002521-361515/002525-783799.  Ckg114@hotmail.com.