Towradii waxaan uga tegoon Xabash u taageeray

Kursigu taargid buu ii ahaa taniyo toban jirkeygiye

Kali-talisnimo waa waxaad igu tiqiineene

Talo-wadaag inaad igu daydiin tii aan rabay maaha

Tekniko waxaan Bakaaro u diriyo tuugo la hubeeyey

Inay maantay weli taagan tahay tii aan rabay maaha

Hawiyahaan tumaatida la rabay tiir-adayg noqoye

Sawaariiqdey igu tumahayaan tii aan rabay maaha

Hawiye taliyo towfiiq malaha talo-galkeygiiye

Tusaalahakan Xaad bixinhayaa tii aan rabay maaha

Dir waxaan tamadin jirey Hawiyeey tub isku raaceene

Digiliyo Mirif talaa u go’an oo waa ina takooreene

Xawaadlaha tubaha gooyayoo taagan Garasyaani

Gaaljecelka towfiiqay oon labo na taageerin

Gugundhabe halkuu taagan yahay tii aan rabay maaha

Abgaaloo u tiro badan Hawiye, Qaar i taabacaye

Tafaraaruqa Sheekh Shariif wado, tii aan rabay maaha

Marsadii tolkey degi jirey, ee Talyan nagu beeray

Taladeed mahaynoo tukaa, caanihii qubaye

Kismaanyaa Mareexaan ka talin. tii aan rabay maaha

Haddii aan Tigree keenay iyo, taangi iyo BM

Habargidirna Utaango aanay tegin, tii aan rabay maaha

Habargidir tabcadaan la helay, saan u kala tuuray

Murusade inay toosiyeen, tii aan rabay maaha

Markii Aadan Cayrow tegoon, guul ku taamahayey

Al Shabaab inay soo tarmeen, tii aan rabay maaha

Wadaadada tafaha xaydan ee, taangiga hortaagan

Taageeraday helahayaan, tii aan rabay maaha

Tigree wixii wadaado aan ka gaday, ahlu-towxiida

Inay masaajidii tuban yihiin, tii aan rabay maaha

(2)

Tafaruqi Maxkamadaha haddii, laygu taageeray

In dagaalkii weli taagan yahay, tii aan rabay maaha

Gantaalaha turuuskaa haddii, aan ku talantaalshey

Miinada dariiqyada la tixay, tii aan rabay maaha

Haddaan Geeddi tuuroon is iri, Nuur-caddaa tuxusha

Tab qarsoon inuu igu dibriyey, tii aan rabay maaha

Shantii sano inay iga tagtoon, tiira-dhigid joogo

Cadowgiina soo taagan yahay, tii aan rabay maaha

Wadaantii rag iigaga tegoo, aan nin-tooxsanayey

Toobaaska lagu jeexayaa, tii aan rabay maaha

Todobaatan iyo laba (72) jirkaa, taahayaan ahaye

Hoobiyaha talantaaligaa, tubaha soo oodmay

Tashwiishkey beryahaan igu hayaan, tii aan rabay maaha

Taajkii Majeerteen inaan, toosiyaan rabaye

Towfiiq-darradu waa waxaad, igu tuhmeyseene

Inaan tacab khasaar ahay haddaan, idin tusaaleyne

Taariikh madow baan dhaxliyo, toobad-seegnimo’e

Towreed iyo Injiil iyo Furqaan, toona maan heline

Tabaalaha adduunyada maxaan, tacaddi soo joogay !!!